ಇಂಥಲ್ಲಿರಬೇಕು ಜನ್ಮ ಸಾರ್ಥಕ : Inthallirabeku Janma Sarthaka

ಇಂಥಲ್ಲಿರಬೇಕು ಜನ್ಮ ಸಾರ್ಥಕ

ಕೀರ್ತನಕಾರರು : ಪ್ರಾಣೇಶ ವಿಠಲರು 
ರಾಗ : ಪೂರ್ವಿ 
ತಾಳ : ಆದಿ 

ಇಂಥಲ್ಲಿರಬೇಕು ಜನ್ಮ ಸಾರ್ಥಕ ಮಾಡುವ ನರನು 
ಎಂಥೇಂಥಲ್ಲೆಮ್ದರೆ ಕೇಳ್ವುದು ಸುಜನರು ಪೇಳ್ವೆನದನು      ।।ಪ।।

ಭಾಗವತಾದಿ ಪುರಾಣ ಸಾತ್ವಿಕರು ಪೇಳುವ ಸ್ಥಳದಲ್ಲಿ 
ಭಾಗೀರಥಿ ಮೊದಲಾಗಿಹ ಸತ್ತೀರ್ಥಗಳಿಹ ಭೂಮಿಯಲಿ 
ಯಾಗ ಮಾಡುವಲ್ಲಿ ನಾಗಪಾಲಕನ ಆಲಯವಿದ್ದಲ್ಲಿ 
ಯೋಗಿಜನರು ಅಹರ್ನಿಶಿಯಲಿ ಭಗವಧ್ಯಾನ ಮಾಡುವಲ್ಲಿ  ।।೧।।

ಸತ್ಯವಚನವಿದ್ದಲ್ಲಿ ದುರ್ವಿಷಯ ಬಿಟ್ಟ ಪುರುಷರಲ್ಲಿ
ಮತ್ತರಾಗದಲೇ ಬ್ರಹ್ಮಚಾರಿ ಮಾತ್ರಕ ನಮಿಸುವರಲ್ಲಿ 
ವಿತ್ತರಾಶಿ ಕಸಕುಪ್ಪಿ ಸಮನೆಂದರಿತು ಇಹರಲ್ಲಿ 
ಮರ್ತ್ಯರಾಶ್ರಯಿಸಿ ಒಂದುಕಾಲಕುಪಜೀವಿಸದವರಲ್ಲಿ       ।।೨।।

ತತ್ವವರಿತು ನೋಳ್ಪರಿಗೆ ಹುಚ್ಚರಂದದಿ ಇದ್ದವರಲ್ಲಿ 
ಉತ್ತಮವಾಗಲಿ ಕೆಟ್ಟದೆ ಆಗಲಿ ನಗುತಲೆ ಇಹರಲ್ಲಿ 
ಕತ್ತೆಯೆ ಮೊದಲಾಗಿಹ ಪ್ರಾಣಿಗಳಲಿ ಸಮಕರುಣಿದ್ದಲ್ಲಿ 
ಸತ್ಯರಮಣ ಪ್ರಾಣೇಶವಿಠ್ಠಲನ ಮೂರ್ತಿಕಾಂಬರಲ್ಲಿ         ।।೩।।

Labels: ಇಂಥಲ್ಲಿರಬೇಕು  ಜನ್ಮ ಸಾರ್ಥಕ, Inthallirabeku Janma Sarthaka, ಪ್ರಾಣೇಶ ವಿಠಲರು, Pranesha Vithalaru